பொது கணக்குகுழு....

எதிர்கட்சிகள் விரும்பும் கூட்டுகுழு பற்றி சென்ற பதிவில் பார்த்தோம். இந்த பதிவில் ஆளும்கட்சி விரும்பும் பொது கணக்குகுழு என்பதை பற்றி பார்ப்போம்.

ஆங்கிலேயர் ஆட்சிக்காலத்தில் மான்டேக்-செம்ஸ்போர்டு சீர்திருத்தங்களின் விளைவாக, 1921-ம் ஆண்டில் முதன் முறையாக பொது கணக்கு குழு அமைக்கப்பட்டது. அப்போதெல்லாம், நிர்வாக சபையின் நிதி உறுப்பினர்தான், அக்குழுவின் தலைவராக இருந்தார். சுதந்திரம் பெற்ற பிறகு, மத்திய நிதி மந்திரியாக இருப்பவர் பொது கணக்கு குழுவின் தலைவராக செயல்படும் வழக்கம் ஏற்பட்டது.    

ஆனால் இந்தியா, குடியரசு நாடக மாறிய பிறகு பொதுகணக்கு குழுவில் தலைகிழ் மாற்றங்கள் ஏற்பட்டன. அக்குழு பாராளுமன்ற சபாநாயகரின் கட்டுப்பாட்டின் கிழ் கொண்டு வரப்பட்டது. அக்குழு, எம்.பி.களே உறுப்பினர்களாக தேர்ந்தெடுக்கப்பட்டனர். அவர்களில் இருந்து ஒருவரை குழுவின் தலைவராக சபாநாயகர் நியமித்து வந்தார்.

நியமனம் 

தற்போது, பாராளுமன்ற சபைநடவடிக்கை விதிமுறைகளின்படி ,பொதுகணக்கு குழு ஆண்டுதோறும் மாற்றி அமைக்கப்படுகிறது. ஆண்டு தோறும் மக்களவை எம். பி.களில் 15 பேரும்,  மேல் சபை எம்.பிகளில் 7 பேரும் இதன் உறுப்பினர்களாக தேர்ந்தெடுக்கப்படுகிறார்கள். இவர்களின் பதவிக் காலம், ஒரு வருடம் மட்டுமே. இவர்களில் ஒருவரை குழுவின் தலைவராக சபாநாயகர் நியமிப்பது வழக்கம்.

1967-ம் ஆண்டுக்கு முன்புவரை ஆளுங்ககட்சி எம்.பி.யே. பொது கணக்கு குழு தலைவராக நியமிக்கப்பட்டு வந்தார்.1967-ம் ஆண்டில் இருந்து தான் எதிர்க்கட்சியைச் சேர்ந்தவர் தலைவராக நியமிக்கும் வழக்கம் ஏற்பட்டது. தற்போது வரை, அந்த நடை முறை நீடித்து வருகிறது 

செயல்பாடுகள் 

பொது கணக்கு குழுவின் செயல்பாடுகள், மக்களவை அலுவல் நடை முறைகள் விதிமுறைகளில் தெளிவாக குறிப்பிடப்பட்டுள்ளது. மத்திய அரசின் செலவுகளுக்காக, பாராளுமன்றம் ஒப்புதல் அளித்த தொகை தொடர்பான கணக்குகளையும், மத்திய அரசின் ஆண்டு நிதி கணக்குகளையும்,  பாராளுமன்றத்தின் முன்பு சமர்ப்பிக்கப்படும். இதர கணக்குகளையும் ஆய்வு செய்வது பொது கணக்கு குழுவின் பணி ஆகும்.

மத்திய தலைமை கணக்கு தணிக்கை அதிகாரியின் அறிக்கையை ஆய்வு செய்வதும், பொது கணக்கு குழுதான், மத்திய அரசின் ஆண்டு கணக்குகளை ஆய்வு செய்யும் மத்திய தலைமை கணக்கு தணிக்கை அதிகாரி, தனது அறிக்கையை ஜனாதிபதியிடம் தாக்கல் செய்வார். ஜனாதிபதி மூலமாக பாராளுமன்றத்துக்கு வரும் அந்த அறிக்கை, மிகவும் நுட்ப்பமனாதாகவும், சிக்கலானதாகவும் இருக்கும், அதை பாராளுமன்றம் விரிவாக ஆய்வு செய்வது கடினம். அதற்கு போதிய நேரமும் ஒதுக்க இயலாது, ஆகவே அந்த அறிக்கையை ஆய்வு செய்யும் பணியை பொது கணக்கு குழுவிடம் பாராளுமன்றம் ஒப்படைத்துவிடும்.

பணிகள் 

*  ஆகவே இத்தகைய ஆய்வுப்பணிகளை மேற்கொள்ளும் பொது கணக்கு குழு தனது ஆய்வில் கிழ் கண்ட அம்சங்களை சரிபார்க்க வேண்டும் அவை என்ன என்று பார்ப்போம் 

*  கணக்கில் காட்டப்பட்டுள்ள தொகை உரிய முறையில் செலவிடப்பட்டுள்ளதா? என்று பார்க்க வேண்டும் 

*  செலவு கணக்கு ஒத்துப் போகிறதா..? என்று பார்க்க வேண்டும். 

*  எல்லா மறு ஒதுக்கீடும் உரியவிதிமுறைப்படி செய்யப்பட்டுள்ளாதா? என்று பார்க்க வேண்டும் 

மேலும் அரசு பொதுத்துறை நிறுவங்கள், வர்த்தக மற்றும் உற்பத்தி நிறுவனங்கள். தன்னாட்சி பெற்ற அமைப்புகள் ஆகியவற்றின் வரவு செலவு கணக்குகள், லாப-நஷ்ட கணக்குகள் ஆகியவற்றையும் பொது கணக்கு குழுவே ஆய்வு செய்கிறது.

பாராளுமன்றம் ஒப்புதல் அளித்த தொகைக்கு அதிகமாக எந்தப் பணிக்காவது பணம் செலவழிக்கப்பட்டு இருந்தால் அதற்கான காரணங்களை பொது கணக்குகுழு ஆய்வு செய்யும்.அது தொடர்பாக, மத்திய அரசுக்கு தனது சிபாரிசை தெரிவிக்கும். அலட்சியம் காரணமாக,நஷ்டமோ ஆடம்பர செலவோ ஏற்பட்டுள்ளதாக தெரிய வந்தால், அது பற்றி சம்பந்தப்பட்ட அமைச்சங்களிடமோ அல்லது துறைகளிடமோ பொது கணக்கு குழு விளக்கம் கேட்க்கும். மீண்டும் அத்தகைய தவறு ஏற்படாமல் இருக்க என்ன நடவடிக்கை எடுக்கப்பட்டுள்ளது என்று கேட்டறியும் அத்தகைய சூழநிலையில், அந்த அமைச்சங்கள் அல்லது துறைகள் மீது பொதுகணக்கு குழு தனது கண்டனத்தை பதிவு செய்யலாம். அதிருப்தியையும் தெரிவிக்கலாம்.

இத்தகைய அதிகப்படியான செலவுகளை ஒழுங்குபடுத்தி கொள்வதற்காக, அதை பாராளுமன்றத்தின் ஒப்புதலுக்கு கொண்டு வருவது மத்திய அரசின் வழக்கம்.அதற்கு விரைவாக வழி ஏற்படுத்திக் கொடுக்கும் வகையில் பொது கணக்கு குழு முன் கூட்டியே ஒப்படைத்து விடும். 

பொதுவாக, மத்திய அரசின் கொள்கை முடிவுகள் குறித்து பொது கணக்கு குழு எந்த கருத்தும் தெரிவிப்பது இல்லை. ஆனால் அந்த கொள்கை முடிவுகளை செயல்படுத்துவதுவதில் நஷ்டமோ, ஆடம்பர செலவுகளோ ஏற்பட்டால், அதை சுட்டிக்காட்ட, குழுவுக்கு உரிமை உண்டு.

நடவடிக்கை அறிக்கை 

தணிக்கை அறிக்கையை பொது கணக்கு குழுவின் ஆய்வுக்கு அனுப்பி வைக்கும் போதே, மத்திய அரசு இன்னொரு காரியத்தையும் செய்கிறது. தணிக்கை அறிக்கை மீது, தான் எடுத்த நடவடிக்கைகள் மற்றும் எடுக்க திட்டமிட்டுள்ள நடவடிக்கைகளை பொது கணக்கு குழுவுக்கு தெரிவிக்கிறது. தணிக்கை அறிக்கை தாக்கல் செய்யப்பட்ட 6 மதங்களுக்குள் இதை மத்திய அரசு செய்கிறது அந்த நடவடிக்கை அறிக்கையை பொது கணக்கு குழு பரிசீலித்து ஒழுங்கு படுத்துகிறது.

அதன் அடிப்படையில் பாராளுமன்றத்தில். நடவடிக்கை அறிக்கை தாக்கல் செய்யப்படுகிறது அதில் கூறப்பட்டுள்ள சிபாரிசுகள் தொடர்பாக, தான் எடுக்க உள்ள நடவடிக்கைகள் குறித்து மத்திய அரசு தனது இறுதி பதிலை பொது கணக்கு குழுவுக்கு தெரிவிக்கும், இவ்விதமாக ஒவ்வொரு விஷயத்திலும் மத்திய அரசின் நடவடிக்கை விவரங்கள்,பாராளுமன்றத்தில் அறிக்கை வடிவத்தில் தாக்கல் ஆகின்றன. இத்துடன் சம்பந்தப்பட்ட விஷயத்தில் பொது கணக்கு குழுவின் ஆய்வுப்பணியும் முடிவடைகிறது. 

   

	Tweet